By: Doniel B Aguirre

Para magserbe nga inspirasyon sa mga tawo nga may deperensya sa eawas o kun Persons With Disabilities, ginpangunahan ni Mayor Juris Bautista Sucro ro pagta-o it padungog sa mga indibidwal nga PWD nga may mabahoe nga kontribusyon sa maumwad nga komunidad bisan sa pihak it andang deperensya sa eawas. Sa ginhiwat nga 44TH National Disability Prevention and Rehabilitation Week Celebration ku nagtaliwan nga dominggo, nagbaton it pagkilaea ro mga masunod: Mr. Wilnard Z Dominguez, Mr. Francis Charles Salazar, Mr. Gabrielle Arturo Q Ruiz, Mr. Mark Lester Artocilla, Mr. Ricky Molo, Mr. Robert Ryan P Mosquito ag Mr. Leenard Cristobal.

Sanda ra hay mga Kalibonhon nga PWDs nga nagtinguha ag nagapangibabaw sa nanari-saring aspeto it pagpangbuhi sa pihak it mga deperensya. Dugang kara, ginpangunahan pa gid it Alkalde ro pagpanupod it mga wheelchair ag iba pa gid nga assistive devices sa mga PWDs sa Kalibo Magsaysay Park, sanda man ra hay nakabaton it mga gatas, cereals, vitamins, bugas ag iba pa gid para sa mga PWDs sa Banwa it Kalibo kaibahan rong mga inunga ku Stimulation And Therapeutic Activity Center STAC Kalibo.

Nagpanupod man it mga Membership Data Records Form MRDs ro Philhealth Aklan daea man ro andang pag-eksplekar parte sa Republic Act No. 11228 “Mandatory Philhealth Coverage”. Presente ag nagta-o man it mga mensahe sanday Ms. Aurora Ignacio, OSCA Head, SB Member Augosto Tolentino, Chairperson on Elderly and Disabled Person, SP Member Jay Tejada, Committee Chairperson on Elderly and Disabled Person ag Mr. Randy Rebaldo, Provincial PDAO HEAD.