Mga Tourism Accommodation Establishments sa Banwa it Kalibo, Magapartisipar sa Programa kung Munisipyo it Kalibo nga Ati-Atihan Room Contest

By: Doniel B Aguirre

Igapasakup man ku mga accommodation establishments kaparehas it mga hotels ag inns ro anda kara nga sambilog nga standard double room para sa paindes-indes ku Munisipyo it Kalibo nga Ati-atihan Room Contest. Rong Ati-atihan Room Contest hay para gid sa mga hotels ag inns iya sa Banwa it Kalibo nga akreditado kung Department of Tourism (DOT), may Certificate of Authority to operate (CAO), ag may Provisionary Certificate of Authority to Operate. Ginpabutyag ni Mr. Kenneth Billones, Tourism Officer I kung Munisipyo it Kalibo ag Chairperson ku nahinambitan nga pa indes-indes katuyuan kara nga hika- promote ro mga hotels ag inns angot man sa selebrasyon kung kapiestahan ni Sr. Sto. Nino.

Kinahang-ean eamang nga dekorahan it Ati-atihan ro anda kara nga standard double room. Rong makabu-oe it primerong pwesto hay may premyo nga p10,000, ro ikaywang pwesto hay p7,500 ag ro ikatlong pwesto hay magadaug it p5,000. Rong registration hay nag-umpisa eon ku disyembre 5 ag matapos eon sa Disyembre 14, 2020. Sarang man makabu-oe it registration form ag guidelines kun mauno makapasakup sa pa indes-indes sa google drive link nga ginpahaum kung Tourism and Cultural Affairs Division (TCAD) ag ipadaea ro naha-sabtan nga registration form sa kalibotour@yahoo.com.

Rong premyo man para sa rondayang pa indes – indes hay magahalin sa mga magasakdag.