Ginlunsar eon ku Bureau of Fire Protection Aklan ro Laban ni E.D.I.T.H. (Exit Drill In The Home) ag Akeanon Kiddie Fire Camp sa Citymall Kalibo kainang agahon Oktubre 18, 2022. Rong Laban ni E.D.I.T.H. hay dire-deretso nga kampanya it mga bumbero agud matandaan it mga pumoeuyo ag mangin kaparte it pangabuhi ro importansiya it regular nga pag-obra it Exit Drill sa andang kaba’eayan agud mapahagan-hagan kun indi gid man malikawan nga disgrasya ag kun amat hay pagkaduea it kabuhi. Ginpakita man sa mga imbitadong mga Estudyante ag iba pa gid nga tumaean-aw sa Citymall ro Instructional Video it Exit Drill In The Home kun sa siin pwedeng makabu-oe it kopya pina-age sa pag-scan sa Quick Response (QR) Code nga nakabutang sa mga tarpaulin ag posters. Ginpa-age pa gid ro pagpa-intiende sa mga pumueoyo parte sa Exit Drill In The Home gamit ro makabag-ong teknolohiya nga ginatawag nga digital sa pagta-o it pahanumdom sa komunidad kun ano ro dapat himuon kun may sunog sa panimaeay. Gin-asisteran man ku mga Firefighters it Bureau of Fire Protection ro mga Pre-School Learners sa ginhiwat nga Akeanon Kiddie Fire Camp matapos nga gin-lunsar raya kaina. Ginpakita man ni Mayor Juris Bautista Sucro ro anang suporta sa programa ku Bureau of Fire Protection. Sa pagpahayag ni Mayor Sucro, nga importante gid matur-an ro mga inunga it insaktong ka’ae-aman kun ano ro obrahon kun oras it ka’ea-eat-an ag iba pa gid nga emerhensiya. Ana pa gid nga ginpanginbolahan ro mga Fire Fighters sa andang mga pagtinguha nga ma-edukar ro mga pamatan-on ag para man sa pumueoyo it pinalanggang Bagong Kalibo.