By: Doniel B Aguirre

Ginpanginbulahan gid ni Mayor Emerson Lachica, kahapon Hulyo 21, 2020 ro mga empleyado it LGU kalibo nga nagapanerbisyo sa munisipyo it kalibo sa sueod it napueong (10) dag-on, kinse (15) dag-on, bente (20) dag-on, trenta (30) dag-on ag trenta y singko (35) dag-on makaron. Sa ginpatigayon nga service loyalty awarding rites ku Office for the Human Resource sa pagpamuno ni Ms. Eleanor Isada HRMO V, ginpa-abot ku alkalde ro anang pagpangumuyo nga mangingin kaibahan gihapon ro mga service loyalty awardees sa Local Government Unit it Kalibo agud padayon pa nga ma-improbar ro lokal nga gobyerno. Suno sa alkalde, ro mga awardees ro naga serbe nga espeho it munisipyo sa mga kliyente nga naga-adto sa munisipyo bilang nagata-o it frontline services. Ana gid nga ginbilin sa mga empleyado rong pagserbisyo nga may paghiyum hiyum sa mga uyahon ag nagata-o it
kurtisiya sa mga kliyente.

Samtang nagpa-abot man it pagsaeamat si Vice Mayor Cynthia dela Cruz, sa mga awardees tungod ginta-o gid ku mga awardees ro pinaka manami nga dinag-on it andang kabuhi sa pagserbisyo sa mga Munisipyo it Kalibo. Nagapati pa gid ro bise alkalde nga nagapasaeamat man ro nahinambitan nga mga empleyado tungod sa nakabulig man kanda ro lgu kalibo sa ginta-o man kanda nga kahigayunan agud makapanarabaho. Gintaw-an man it importansiya ni SB Member Mark Vega Quimpo, Committee Chair on Human Resource ro ginpa-abot ku alkalde sa mga empleyado nga ro Kalibo hay isaeang ka Vibrant, Liveable and Greener City. Suno kana, ro naabutan makaron it Kalibo hay uwa natabo kun uwa man sa bulig ag kooperasyon
it mga empleyado. Gindugang pa gid ni Quimpo nga rong papel it mga empleyado sa mga awards ag rekognisyon nga nababaton it munisipyo hay mabahoe gid.

Rong awards and recognition program ku LGU kalibo hay isaea sa mga core
areas ku program to institutionalize meritocracy and excellence in human
resource management PRIME HRM nga ginapatikasog ku Office for
the Human Resource it munisipyo.